Ողջույն Հյուր | 
Այսօր հունվարի16-ին Հայ-Ռուսական (Սլավոնական) համալսարանում կայացավ սուսերամարտի Հայաստանի ֆեդերացիայի հերթական հաշվետու ժողովը, որին ներկա էին ֆեդերացիայի նախագահ Արմեն Գրիգորյանը, ՀՀ սպորտի և երիտասարդության հարցերի փոխնախարար Արտաշես Նազարյանը, նախագահության անդամներ, մարզիչներ…
Մինչ քննարկումներին անցնելը Արմեն Գրիգորյանը շնորհավորեց ներկաների Ամանորն ու Սուրբ Ծնունդը, ապա խոսքը տրվեց Արտաշես Նազարյանին: Փոխնախարարը, ով լավ ծանոթ էր սուսերամարտի պատմությանը, նշեց, որ տեղեկացված է, որ սուսերամարտի ֆեդերացիան ունի Ռիո Դե ժանեյրոյի օլիմպիական խաղերի երեք հավանական թեկնածու: <Մի քանի օրից իրենց աշխատանքն են սկսելու գիտական խմբերի մասնագետները: Նրանք ձեզ կօգնեն, որպեսզի օբյեկտիվորեն գնահատեք ձեր սաների իրական ուժն ու ըստ այդմ ծրագրավորեք ձեր անելիքները>,-ասաց Ա. Նազարյանը: Նա նաև նշեց, որ կառավարությունը հաստատել է մարզադպրոցներին գույքով ապահովելու խնդրանքը և կոչ արեց հստակ ծրագրեր ներկայացնել նախարարություն:
Արմեն Գրիգորյանն էլ տեղեկացրեց, որ Հռոմում սուսերամարտի միջազգային ֆեդերացիայի վերջին ժողովի ժամանակ միջազգային ֆեդերացիայի նախագահի հետ գույքի և հանդերձանքի օգնության նոր պայմանագիր են կնքել: Նա նաև նշեց, որ բանակցության արդյունքում 2015 թվականին երկու մարզիչ միջազգային ֆեդերացիայի հաշվին կվերապատրաստվի Եվրոպայում, իսկ մեկ մարզիկ էլ կմասնակցի Տաշքենդում կայանալիք երիտասարդների աշխարհի առաջնությանը: <Պարոն Նազարյան, մեր մարզադպրոցների մեծ մասը համալրված է մարտուղյակներով, էլակտրաարձանագրիչներով, զենքով, միայն կխնդրենք Ձեզ մեզ օգնել շեղբի հարցում, որը շատ արագ է շարքից դուրս գալիս,-փոխնախարարին դիմեց սուսերամարտի ֆեդերացիայի նախագահ Արմեն Գրիգորյանը: Իսկ Գյումրու սուսերամարտի մարզիչների մարտուղյակ տրամադրելու խնդրանքը բավարարեց հետևյալ պատասխանով. <Մենք ձեզ անցյալ տարի բականաչափ գույք ենք տրամադրել, իսկ այս տարի վստահաբար ասում եմ, որ դուք կստանաք նաև մարտուղյակ>:
ՀՀ սպորտի և երիտասարդության հարցերի նախարարը անակնկալ էր պատրաստել. նա նախարարության պատվոգրով պարգևատրեց խոցասուսեր զենքաձևի Հայասատնի հավաքականի գլխավոր մարզիչ Անդրանիկ Արազյանին:
Այնուհետև զեկույցով հանդես եկավ ֆեդերացիայի գլխավոր քարտուղար Արտաշես Մադոյանը: Նա մասնավորապես նշեց, որ 2014 թվականին ֆեդերացիան կազմակերպել է 16 միջոցառում՝ Հայաստանի երեք առաջնություն, միջազգային յոթ մրցաշար, երկու ուսումնամարզական հավաք, Հայաստանի գավաթ և այլ միջոցառումներ: <Միջազգային մրցաշարերում մեր սուսերամարտիկները նվաճել են 6 ոսկե, 9 արծաթե, 10 բրոնզե մեդալ: Ընդհանուր առմամբ մեկով ավելի, քան 2013-ին էր>,-նշեց գլխավոր քարտուղարը: Մադոյանը մտահոգությամբ նշեց, որ նվազել է սուսերամարտով զբաղվողների թիվը:
Զեկույցներ ունեցան նաև ճկասուսեր և խոցասուսեր մարզաձևերի մարզիչներ Արտաշես Մադոյանն ու Անդրանիկ Արազյանը, որից հետո բուռն քննարկումներ եղան: Տարբեր առաջարկներից հետո որոշվեց ֆեդերացիայի սակավ գումարները որքան հնարավոր է ռացիոնալ օգտագործել՝ շեշտը դնելով դեպի Ռիո դե Ժանեյրո: Մասնավորապես՝ ներկա պահին հայկական սուսերամարտը ունի երեք ընգծված առաջատար, որոնց համար լուրջ ներդրումներ են հարկավոր: Նրանք են՝ Էդուարդ Հովիկյանը, Մայքլ Հովհաննիսյանն ու Էմմա Պողոսովան:
Մարզիչներին խորհուրդ տրվեց որքան հնարավոր է շատ համատեղ մարզումներ անցկացնել տեղերում, իսկ ուսումնամարզական հավաքների թիվը շատացնել՝ նվազեցնելով մասնակիցների թիվը: Այսինքն՝ ոչ թե քանակ ապահովել, այլ՝ որակ: Նույնիսկ խորհուրդ եղավ աշխարհի առաջնության առայժմ չմասնակցել կամ մասնակցել մեկ հոգով և դրա փոխարեն մեր հեռանկարային մարզիկներին ուղարկել որևէ եվրոպական երկիր՝ համատեղ ուսումնամարզական հավաքի:
Նախկինում անվանի մարզիկ Սամվել Աբրահամյանն էլ խոստացավ, որ սեփական գումարներով տարեկան մեկ-երկու խոշոր մրցման կուղարկի մեկ մարզիկի և մեկ մարզչի:
Այս հուսադրող և ոգևորիչ նոտայով էլ ավարտվեց սուսերամարտի ֆեդերացիայի հերթական հաշվետու ժողովը:
Հուսանք, որ հայ սուսերամարտիկները նախկինի նման իրենց դիպուկ խոցումներով կուրախացնեն եվրոպական, համաշխարհային, ինչու չէ նաև օլիմպիական մարտուղյակներում:
