Նորագավիթի սուսերամարտի մասնագիտացված մարզադպրոցում ավարտվեց Հայաստանի գավաթի խաղարկությունը, որին ընդհանուր առմամբ մասնակցեց հարյուրից ավելի մարզիկ:

Նորագավիթի սուսերամարտի մասնագիտացված մարզադպրոցում մեկնարկած Հայաստանի գավաթի խաղարկության առաջին օրը մարտուղյակը տրամադրվել է խոցասուսերակիրներին: Տղամարդկանց վճռորոշ մրցամարտերում  24 ուժաղագույների պայքարում հաղթող դարձավ Ալբերտ Գրիգորյանի անվան Արաբկիրի թիվ 6 մարզադպրոցի սան Արամայիս Գաբոյանը, ով եզրափակչում պարտության մատնեց Հայաստան Մարզական միության սան Միքայել Ղազարյանին : Երրորդ տեղերը գրավեցին Հայաստան մարզական միության ևս երկու մարզիկներ՝ Արկադի Մուրադյանն ու Վարդան Ռուբենյանը, իսկ  աղջիների  12 մասնակիցների պայքարում, ինչպեսև սպասվում էր հաղթող դարձավ միջազգային մրցաշարերի հաղթող Էմմա Պողոսովան: Նա եզրափակիչում պարտության մատնեց Հայաստան մարզական միության սան Լիլիթ Էվոյանին: Պատվանդանի երրորդ աստիճանին կանգնեցին Աննա Ավետիսյանն ու Սվետլանա Նազարյանը: Էվոյանից բացի, բոլոր մասնակիցները ներկայացնում եմ Բյուրեղավանի Քեթրին ակումբը:

 Մայիսի 28-ին մցեցին ճկասուսերակիրները, որտեղ եզրափակչում հանդիպեցին Ալբերտ Գրիգորյանի անվան թիվ 6 մարզադպրոցը ներկայացնող Էմիլ Դանիելյանն ու հրաձգության մարզադպրոցի սան, միջազգային մրցաշարերի մրցանակակիր և հաղթող  Մայքլ Հովհաննիսյանը: Մրցումային թեժ պայքարի արդյունքում այս անգամ ավելի ուժեղ գտնվեց Դանիելյանը: Երրորդ տեղերը գրավեցին գյումրեցիներ Միհրան Ղազարյանն ու Պարգև Ստեփանյանը:

Մրցումային երրորդ օրը, մեդալներ խաղարկեցին ճկասուսերակիր կանայք և թրասուսերակիր տղամարդիկ:Ճկասուսերակրուհիների պայքարում բոլորից հաջող հանդես եկավ ու պատվո պատվանդանի առաջին աստիճանին կանգնեց Քեթրին ակումբը ներկայացնող Հասմիկ Աղաբաբյանը: Երկրորդ տեղը գրավեց Ալբերտ Գրիգորյանի անվան մարզադպրոցի սան Սուսաննա Ղազարյանը: Երրորդ մրցանակակիր դարձան Մարիամ Հարությունյանն ու Արփինե Աթոյանը (Քեթրին):

Թրասուսերակիրների մրցավեճում բոլորից ուժեղ գտնվեց Արթուր Կարապետյանը (ՀՄՄ): Նա եզրափակչում պարտության մատնեց վանաձորցի Արեն Անդրեասյանին: Վանաձորի ևս մեկ ներկայացուցիչ՝ Արսեն Զուրաբյանը, կանգնեց պատվո պատվանդանի երրորդ աստիճանին: Մյուս երրորդ մրցանակակիրը Հայաստան մարզական միությունը ներկայացնող Ռուբեն Սարգսյանն է:

Շահելով երկու ոսկե և չորս բրոնզե մեդալ՝ թիմային հաշվարկով հաղթող դարձավ և գավաթին տիրացավ Քեթրին ակումբը: